2009年11月11日

我愛街市


永遠慢人半拍的我,今天才開始nojomo。究竟我能否順利完成這個創舉呢?

(*nojomo,November Journaling Month是也。意即在十一月內每日一篇,是opendiary第五年舉行的活動。)


+ + + + +

飛了十多個小時,終終從地球的另一端返回香港。下飛機返回家中放下行李,趕到菜市場買魚買肉南杏北杏果皮準備煲湯。正所謂輸人不輸陣,雖則睏到快腦殘,仍要穿戴漂亮腳踏皮靴裙子買菜去。嗯,但回家後抹鞋抹到想砍人的那一刻,我後悔不已。

是日要煲的,是「川貝生魚蘋果豬展湯」。一聽水蛇春咁長的名字,我已感到興致勃勃。

川貝生魚豬展是什麼? 無概念喎。

踏進菜市場,第一樣要買的,是魚湯袋。

「老闆,我想買魚湯袋呀。」


「阿妹妹,我呢度買燈膽架喎,魚湯袋呢,你直行到尾轉左邊第一間舖頭就有架啦。」


看吧,我幾醒目,亂找一間店舖問,就直接有人告訴你哪裡有賣。要知道,我好累好睏啊,還慢慢左找右找嗎?


「老闆,我想要一粒川貝幾粒南杏北杏。」

「一粒川貝? 無人買一粒喎,係咪一兩呀?」


「一兩有幾多粒呀? 12粒呀?」


「一打先12粒,一兩有幾廿粒。」


「咁全部野都一兩啦。哎呀,仲要買果皮,都一兩啦....」


「我袋埋一齊比你啦,$45」


「阿姐,你又話一兩有幾廿粒,點解我買一兩果皮得幾塊唔係幾廿塊?」


「.................」


「兩係重量,唔係數目呀!!!」旁邊一位看不過眼的阿嬸代答,唔該。


「老闆,我想要一隻豬展。」

「豬就一隻隻,豬展一斤斤。」


「咁我要一兩啦。」


「一兩? (切細細塊豬肉出來)...一兩得咁多喎...」


「我要煲湯,兩個人飲。」


「$20啦好唔好? 」


「有冇呃我?」


「你咁靚,人人都想呃你啦。」


「去街市買野真開心,檔檔老闆都讚我靚。」

「仲有無其他野要呀?」


「生魚.....」

「你信唔信我用呢把豬肉刀斬死你,我賣豬肉你同我講要生魚」


「信。」


「老闆,我想要生魚。」

「你前面呢d咪生魚囉,要幾多?」


「點解生架?」(勁震驚,因為在其他魚店看到的魚,都已死掉攤在一堆冰塊上,但那條生魚是在游泳的。)


「未死咪生囉。」


「因為佢叫生魚,所以就未死呀?」(現在回想,我想講咩呢請問....)


「...........」


「咁我返去煲湯,佢一路游住水咁,點煲呀? 一係你而家幫我放埋落個魚湯袋,打個死結,我怕佢煲煲下游出來呀。」


「 我而家會幫你劏埋架嘛 ! ! ! ! ! 點會游番出來呀? ? ! ! ! ! 」


(那個阿嬸,超激動,而他旁邊的賣魚佬,狂笑。...........嗚.......人家點知咁多喎。)


賣魚阿姐說,回家後要用粗鹽再「省」一下魚身。噢,明晒,即是像我們平日做身體磨砂一樣嘛。我拿著粗鹽,把魚身左擦右擦。那條生魚的質感,像鼻涕一樣,好嘔心。為了更好的效果,我出盡奶力。最後,手被魚鰭磨得破皮。好想打人。友後來跟我說,用粗鹽擦魚身,原來,要戴手套。頂丫.....

沒有留言:

發佈留言